關於左膠同藝術嘅一啲隨想*

甲、寓言一：有病毒入侵體內，病毒認為人人都可以係紅血球，冇理由只有紅血球先致算紅血球，要開放想像力，打破紅血球嘅藩籬，故此紅血球唔應該有細胞膜。呢種「理論」越嚟越多細胞接受咗，而且付諸實行，結果發生「溶血現象」，成個人突然暴斃。

乙、寓言二：有個人朝早痾咗舊屎，佢堅稱呢舊屎係藝術品。首先，呢舊屎係佢今朝原創嘅。其次，自開闢以來，都冇一舊相同嘅屎，呢一舊係獨一無二嘅。最後而且最重要嘅係佢認為呢舊屎充滿詩意。當大眾漸漸同意佢嘅「理論」，咁以後就唔使旨意讀詩，只可以聞屎。

丙、自古以來藝術都係以形式同技巧做藩籬，偽藝術家為咗取得藝術家嘅地位，就推廣一種乜都可以係藝術、乜人都可以係藝術家嘅「理論」。當藝壇最終變成無厴 雞籠嘅時候，一大班不學無術嘅人就可以走入去濫竽充數。而呢班人原初嘅動機好可能只係認為「藝術家」嘅地位可以令佢地更加吸引異性，或者可以方便佢地申請 各種公私資助；總之就離唔開財色二途，佢地嘅動機唔單止唔高尚，實在係好下流。當有清醒一啲嘅人批評佢地嘅時候，佢地就會話「你地都冇理論﹗」的確，除咗 偷呃拐騙需要理論之外，做個老實人需要理論嘅咩？

丁、再講下一個題外嘅例子：體壇點解唔死？因為體壇重係由一班真正嘅體育家把持。每一項運動，都有嚴格嘅規則同指定動作，你要做一個「運動員」，就一定要 跟規矩，唔可以冇規冇矩。如果左膠要染指體壇，其實可以用返用喺藝壇嘅手段。首先發明一套「理論」，話而家各個體育總會係霸權，佢地冇資格話乜人係運動員 乜人唔係，人人都係運動員，只要隨心所欲郁手郁腳都係體育，體育精神就係舒筋活胳志在參與。再高層次啲可以加啲馬克思等人落去，認為諸多要求嘅體壇只係令 有錢人可以參與體育活動而弱勢人士就望門興歎；大型國際賽事更加係國家主義嘅體現，係政權比拼實力而非運動員一較高下，諸如此類。只要年年講月月講日日講 呢啲「理論」，我包保體壇一定會好似藝壇咁玩完。

*呢篇係回應國師喺facebook嘅留言而作，國師係針對《字花》發起嘅「藝術活動」「刪字成詩」而發言，國師話：「官僚式的政府資助如何將文學庸俗化，搞死了的？由於香港某些藝術界聲稱藝術或文學沒有標準，於是發出資助的當局不能用標準和評鑑來判斷，便改用社會服務、 藝術推廣、藝術教育的名目來發出資助。於是藝術入了老人院、兒童圈、消閒圈，變成娛樂，搞死了。玩玩刪字成詩、碟仙扶箕寫詩都是文學活動。你認為藝術是主 觀的，沒有標準的嗎？那麼請你舉出一個主觀的藝術來看看？你甚至不可能舉出一句主觀的句子！你一開口，就是客觀的。你要主觀，除非你是上帝。」見2015年4月8日facebook。

圖片說明：據稱係最令人滿意嘅「刪字成詩」作品。
圖片來源：黃家進嘅facebook。