鏟除泛民一切組織方為香港人當務之急﹗

虞瑋倩：點解金鐘咁令我憤怒？在於嗰度好多人跟住泛民左膠雙學嘅雙重標準。
旺角嘅人叫衝你哋聽晒佢哋講話係鬼，就跟住話係鬼．到雙學叫衝就支持。
旺角嘅人整盾牌，你哋笑，到響應雙學叫衝嘅群眾自己拎盾牌，就欣賞。
其他人帶頭衝擊立法會，唔比律師支援，響應雙學嘅有律師支援。
衝擊立法會嘅逃避警方話佢哋冇責任感，響應雙學嘅衝擊後受傷、被捕，雙學鞠躬道歉就收貨。

數數下，真係滾。根本喺金鐘好多群眾係「雙學粉絲」，抱住追星心態，自然就自己偶像做乜都啱，都要支持。你哋唔順超就係鬼、拖累運動。[1]

所以話，金鐘清咗場，唔抵可憐，應該高興﹗
金鐘唔清場，雙學、偽左翼社運慣匪永遠有個神主牌依托。
學民只係學聯嘅中學版，而學聯係隱性中共外圍組織，同教協一套兩件，一個控制大學生，一個控制教師，透過呢兩件嘢，中共間接控制晒學界，呢個就係泛民祖師爺司徒匪華最初設計嘅構想。
學民出現後，自然亦成為泛民嘅外圍組織，幫手控制中學生，算係學聯嘅擴充部份。
所以雙學都只不過係泛民嘅第二梯隊，通通都同泛民同氣連枝，將來要接泛民嘅棒，繼續食盡中共、美國兩家茶禮﹗
佢地再外加同行偽左翼社運慣匪，即係左膠，組成一夥狐群狗黨，表面以爭民主或平等吸收唔同性質嘅客源——民主吸引中產、平等吸引未成中產嘅青年，實際操縱港人、出賣港人，以港人為佢地嘅政治籌碼，向中共、美國勒索自身嘅政治利益﹗呢一行叫做「食政治飯」，明冇？
傳統左派只能食中共一家茶禮，擺明車馬、貨真價實係中共外圍組織，佢地表現得老實好多。
認清泛民同相關組織嘅真面目，你會睇明好多以前唔明嘅現象。將呢班食豐厚傭金嘅中間人連根拔起，係港人政治自立嘅第一步﹗扶植真正本土政黨，係港人政治自立嘅第二步﹗唔鏟除泛民，香港人永遠畀佢地賤價而沽﹗

*順帶一提，偽左翼社運慣匪引導群眾，令佢地做到「見到人衝就話係鬼」，立即舉報，甚至制服。呢種強加一種處境或價值畀群眾，再由群眾互相監察，互相檢舉嘅做法，係利用群眾控制群眾最典型而又低成本嘅手段：納粹黨控制猶太人集中營用過，共產黨控制人民用過。香港人，你到底知道你地係乜嘢身份未？ 如果豬會講說話，豬場都會用呢種手段管理﹗

[1] 見虞瑋倩十二月一日facebook留言。文字略有改正。

二零一四年十二月三日