停食花生，準備逃生﹗

呢張係上證指數八年週線圖，就算你完全唔識「技術分析」，只要望下張圖你都會估到有大事發生緊。中國嘅經濟泡沫源於零八年四萬億刺激經濟方案，之後就陸續產生信貸泡沫、人民幣泡沫、房地產泡沫。為咗救前任留低嘅爛攤子，習近平唯有谷起股市，用資產泡沫救前面嘅泡沫。中國好似除咗生產泡沫，已經生產唔到其他嘢。除咗畀各方勢力多一個要害整死中共之外，乜嘢用都冇。

以上呢啲都唔係我想講嘅嘢，以下先係緊要嘢，由於多年嚟香港實行「背靠『祖國』」政策，中國經濟一爆，你唔好以為自己可以隔岸觀火食花生，香港人應該多啲諗下將會面對嘅金融動盪。粗略講下極端情況：

一、香港銀行界借咗好多錢畀中國企業，如果呢啲數收唔返，佢地損失會有幾多？

二、香港銀行界手持幾多人民幣資產？如果人民幣大幅貶值甚至變成一文不值，佢地會損失幾多？

三、如果股市大跌，銀行嘅「炒房」會同銀行輸幾多錢？

四、香港銀行界如出現巨額損失，你放喺銀行嘅存款會有幾大保障？真係會好似政府所講嘅包每個存戶五十萬？

五、如果因為中國爆煲引致香港房地產泡沫爆煲，銀行會唔會收返你供緊層樓急賣吐現減少損失？

六、香港嘅外匯基金手持幾多人民幣同中國債券？如果全部報銷，咁有幾多資產可以支持聯繫匯率穩定？

七、如果香港金融秩序出現混亂，外國大鱷趁機衝擊聯繫匯率，咁港紙守唔守得住？

八、由於香港已無實業剩返虛業，即靠炒賣股樓為生，如果聯繫匯率守唔住，港紙會跌幾多先致識停？

九、股樓港紙都唔安全嘅話，咁重有咩嘢可以保值？真係剩返金鳳泰國香米？

作最壞嘅打算，做至佳嘅準備，停食花生，準備逃生﹗