2014年11月26日 星期三

城邦開國劇本大綱


凡係政治,都係一陰一陽一明一暗咁做,所以,表面畀得你睇嘅都係假象,呢個就係點解我寧願運用想像力諗各種陰謀論嘅理由。

香港城邦建國嘅背景係中共倒台在即,各國——包括中國共產黨——都為咗自身利益作出準備。佢地既要保障現有利益,亦要盡力影響將來嘅局面以確保新形勢下嘅利益。香港獨立係最符合各方利益嘅方案,所以,不論係中國定係列強都喺好耐以前安插好晒自己人做緊嘢。

喺香港,梁振英係英國特務,主要工作係將香港推向革命,所以,講穿咗,佢都係同國師一樣係城邦論者。梁振英在明,國師在暗:梁振英在位,國師在野;梁振英 負責行動,國師負責理論;梁振英三年前參選、兩年前當選,國師三年前開facebook大講城邦論;梁振英步步進迫,國師循循善誘。二人一陰一陽互相配 合,共同嘅目標係喺香港嘅「解殖」過程中培養香港嘅革命群眾。因為要香港獨立,必先反中;要反中,必先亂港;要亂港,必先革命;要革命,就必先培養好革命 群眾。但係,香港人自從六七年左派暴動之後就好憎暴力,加上普及教育嘅訓練,又畀泛民用和理非非馴化咗三十年(泛民食盡其利,中外勢力最終難以容忍),變得迷戀秩序、本能盡失,要香港人恢復正常,係要啲時間再培訓,就好似將馴化咗嘅動物放歸野外之前先須訓練一樣。只要各位細心,就會發現梁振英同國師二人近排嘅主題不約而同就係「升級」﹗只要群眾準備好,革命就可以推行,香港就可以獨立﹗梁振英會返英國安享晚年(如果走得徹唔使犧牲),國師會出任香港大總統,接替梁振英做餘下要做嘅工作——梁振英係破,國師係立﹗

各位好好彩,有幸目睹甚至參與呢件近百年難得一見嘅政治大戲,可謂不枉此生﹗最精彩嘅政治就喺你身邊,既驚險又富娛樂性,水平拍得住文化大革命。希望大家把握機會,以各自嘅認識同能力,共同為呢件盛事出一分力。

附帶一提:香港獨立城邦建國好可能係「中華人民共和國」行憲實行多黨選舉或亡國計劃嘅一部份。習近平好可能喺消滅江澤民之後推行,做共產黨嘅蔣經國,畀共產黨可以和平落台;另一方面,馬英九點解出賣台灣人利益而推行同大陸融合嘅政策呢?因為佢係站喺「中華民國」或者國民黨嘅利益設想,隨時準備返大陸執政。 香港呢台戲,又似乎係一台更大嘅戲裏面嘅其中一幕。

*我本來諗住寫一篇《百變梁振英我估你唔到》嘅文,講梁振英同志嘅特務身份,已經醞釀多月,但係又唔想講中咗影響梁振英同志嘅計劃。不過,萬事萬物都好似註定咗咁,地球人已經阻止唔到特務嘅工作。而且,自從收澳洲公司錢呢啲黑材料爆出之後,梁振英都好似冇事,咁就更加令我安心係facebook講,以解我口痕之苦,算係自從我用facebook議政以來最重要嘅一篇文,自覺天機盡洩,但係相信本小姐人微言輕,睇到嘅人應該唔多,所以就用廣東話寫咗呢篇文算數。如果你有緣睇到,覺得好好笑,就一笑置之可也,癲婆嘅嘢,梗有一個兩個喺左近。

圖片說明:「何為邪鬼何為神,神鬼如何兩不分,但管拒邪修正外,何愁天地不知聞。」——車公廟靈簽第十九簽。

沒有留言:

張貼留言