關於香港嘅「讓座批鬥」

關於讓座我只講兩句——
喺道德上：點解讓座係值得稱讚嘅好事呢？因為座位係按照先坐先得嘅原則分配，由於你先坐，你有充分權利坐喺座位，而坐喺座位嘅權利又包含喺你已經畀咗嘅車錢裏面。但係，你出於關心其他人，放棄已得嘅應有權利而讓出座位，所以讓座值得稱讚；而由於讓座唔係義務，所以唔讓座亦毋須受到譴責。亦即係話，如果讓座係履行義務嘅話，咁你讓座就只係做咗你應該做嘅事，係唔值得特別受到稱讚嘅。
喺政治上：點解突然會有針對後生仔女唔讓座嘅風潮呢？呢個係政治陰謀，係繼將青年人標籤成「廢青」後再不斷抹黑嘅手段。「廢青」同「港女」等淪陷後出現嘅 新詞係五毛首先用，背後由中國共產黨安排、中聯辦執行，目的係令香港社會排擠香港青年，因為香港青年係共產黨最難控制嘅一類人。能控制嘅就攏絡，如蛇齋餅粽；唔能夠控制嘅就抹黑排擠，如「廢青」「港女」。另外，扮中立出名嘅明報喺呢件「讓座事件」中最落力，亦反映背後安排嘅人好識利用手上嘅傳媒，既唔用東方亦唔用文匯，而用畀人「代表教育界」印象嘅明報出嚟教訓「廢青」。

圖片說明：「很想要吧？」

鉛水餘波

點解發現屋邨食水含鉛嘅會係民協（一月）同民主黨嘅黃碧雲（七月）呢？我七月尾寫《當驗水塘水確定污染源》嘅時候都未諗到，只係講「耐人尋味」四個字。尋味咗廿日，我覺得呢個安排係好精細嘅：如果畀民主黨嘅黃碧雲單獨爆出呢件事，咁就會令人好奇怪，點解佢會無端端諗到驗食水嘅呢？正常香港人一向都相信香港水務署提供嘅食水冇問題，佢又點會突然有靈感去驗呢？咁樣，好容易引起公眾嘅猜測，大家會諗佢背後幫邊個做嘢呢？背後嘅老細放料畀佢到底有咩動機呢？諗下諗下，大眾就會對鉛水本身「失焦」。為咗令公眾只對鉛水而唔係對黃碧雲或其背後老細有興趣，搵個人做陪襯就變得好有必要，咁就令公眾覺得「唔係佢一個人驗到，有其他人都驗到」，從而確保大眾聚焦於鉛水本身。民協畀人中立嘅印象，用佢最能夠令公眾覺得呢件事純粹係公共衛生事件，而唔會諗到同時係一件政治事件。民協係唔生唔死嘅過氣政治組織，好似冇咩政治作用，但原來唔消失都係有其理由，因為有時會有其作用，關鍵只係識唔識用、邊個用、幾時用。又一次證明：政治上係冇巧合嘅事，每件事都經過準確計算同精心安排，務求做到預期想要嘅效果。

鉛水事件爆發至今成個月，唔少人好似我咁叫人驗水塘水甚至東江水，但係冇一個政黨做呢件事，各政黨只係不斷去各區大廈抽水辨化驗，營造鉛水事件蔓延全港嘅視覺效果；而港共政權又好被動咁拖延，最多搵中國建築食死貓。除非有人驗過確定咗真係唔關東江水同水塘水事，否則我好有理由懷疑引爆鉛水事件嘅背後勢力只係想呢件政治事件嘅波及範圍只局限於香港，唔想呢件事燒到去廣東甚至中國。

圖片說明：你飲啲乜，就變啲乜。而背後決定你飲乜嘅人，你永遠唔知佢係邊個。
圖片來源： El cim, l’aeroplà, Àfrica