大型公共工程陰謀論

一、幾日前睇到有人流傳呢個故事，大概係咁：有個喺政府做公共工程嘅公務員，已經退咗休，本來過咗冷河期想出返嚟去私人公司度做，不過佢睇過原來而家啲人真係亂嚟，離譜嘅程度係出事之後監都有得坐，佢都唔想臨老過唔到世，所以都係打消咗返出嚟搵錢嘅念頭，安享晚年算數。（希望冇記錯細節，如有知情者可通知我原文，唔該晒先。）

二、最近接二連三爆出大型公共工程醜聞，你估咁巧合咩？做法係：政府先放鬆手腳唔睇得咁緊，等啲人亂嚟，收集到足夠情報之後，夾好時間，就喺適當時候搵人連環引爆，製造一場危機。已經有人講「豆腐渣工程」香港終於有啦，香港工程同中國接軌啦之類，利用「中國化」令香港人對中國反感係萬試萬靈嘅。

三、搞咁多做咩？就係做好「一國兩制完全失敗」呢套戲。呢套戲，由曾蔭權開始做，跟住就係梁振英，到而家林鄭月娥都做緊，就係特登做衰佢，其中以梁振英做得最好；當然，以上三人都係英國嗰邊嘅人。唔好忘記，連環爆出醜聞嘅公共工程唔係今日先致開工，而係幾年前梁振英在任期間決定嘅，林鄭只係按住劇本做落去。最近調查顯示，受訪香港人自認中華人民共和國人創新低，認為自己係香港人就創新高。呢個就係梁振英嘅主要政績。之前都講過，一個地方要獨立，要靠三樣嘢：一者人心，二者武裝，三者外援。做好「一國兩制完全失敗」呢套戲，為嘅就係「人心回歸」，不過係回歸洋人統治。而呢齣大製作，係用香港人嘅錢埋單咖。

四、中共一冇錢，就會落嚟香港搶。大型公共工程就係最好嘅魚餌，中共根本完全冇抵抗力，一定搶住食，而喺裏面放毒就最容易，因為中國嘅工程公司本身就係是旦同求其嘅最完美結合。

五、有啲中國人話：「香港人只係英國嘅棄犬，唔使旨意英國人插手香港事務。」呢種講法啱唔啱呢？香港人都有可能淪為英國棄犬，但係以英美為首嘅列強仍然每日都要用到香港，以英美搞咁多嘢嚟睇，列強係唔會放棄香港。如果佢哋放棄香港，一國兩制一定運作暢順，如鄧小平最初設想一樣。當然，冇香港人嘅香港，亦唔成其為香港。香港人靈活變通，做事講求效率，好多嘢自己醒水唔使人講自動波做好，就算交行貨都中規中矩，唔會甩甩漏漏，文化上亦已經同國際接軌，語文能力亦唔錯，啲鬼佬用香港人用得都唔知幾咁開心。香港員工配合鬼頭老板，曾經創下世界經濟奇蹟。香港人固然唔係天下無敵，中國人嘅品質如果有日高到可以取代香港人，咁香港人先有機會淪為棄犬，喺呢日嚟到之前，中國人成為洋人棄犬嘅機會都重係大過香港人。

#圖無關但重要

壹傳媒帝國之沒落

壹傳媒唔會執？我諗又唔會啩？《明報》都未執，佢應該好過日月神報啲嘅。不過就好難、甚至冇可能翻身，有啲似Esprit嘅感覺。

《東方日報》尋日好開心咁報導：「業務持續走下坡的壹傳媒(00282)周三(6月6日)發盈警後，今日(6月7日)股價備受沽壓，最多曾急插8%，低見0.23元，續創歷史新低。證券界人士指出，壹傳媒業績難望有翻身機會，投資者應該及早沽貨離場。」（《東網》，2018年06月07日）

紙媒已經玩完，我自己屋企十幾年冇見過報紙，轉網媒係唯一出路。喺好耐以前，報紙唔憂冇廣告，尤其係地產商廣告，佢哋要推新樓盤，會買起各大報紙頭版賣廣告，甚至唔止買一版，當然唔止買一日，當時係報紙最賺錢嘅時代。所以卑鄙無耻嘅中國共產黨為咗打擊壹傳媒嘅收入，就恐嚇各大地產商唔准喺壹傳媒落廣告。不過點都好，地產商而家都唔使用呢啲咁舊嘅宣傳手法推樓盤，呢啲係後話。

蘋果日報要轉網媒，就要同網絡文化融合。曾經何時，的確大有機會成功，時機就係喺李怡主持《蘋果論壇》嘅時候，當時好熱鬧，每日都有四五篇真讀者投稿，網民亦好有興趣傳閱討論，因為李怡係有量度嘅人，好多真民意係可以透過《蘋果論壇》發表，尤其係有「本土」意識嘅文章。不過肥佬黎越睇就越唔順眼，講到明唔畀「本土派」出現喺《蘋果日報》，最後連李怡都保唔到《蘋果論壇》編輯嘅位置，自此之後，《蘋果論壇》變成一池死水，變成自己友圍威畏論壇，嚟嚟去去都係嗰幾個熟口熟面嘅名，一啲畀大部份網民唾棄嘅寫手，例如黃世澤、林忌之流就成日有文出，甚至肥佬黎都自己寫埋一份。經過肥佬黎整頓，我留意到網上傳閱《蘋果論壇》啲文大減，自己一手摧毀份報紙一線生機，肥佬黎實在難辭其咎。

另外副刊嘅《果籽》，我好少好少見到有人傳閱，反而傳閱《香港01》啲深入調查好似多過佢，因為《香港01》確係花心思做好多貼地報導，相反《果籽》就「好離地」咁賣「文青」，可惜文青係唔會買報紙睇咖，佢哋有閑錢都去買多杯咖啡啦，係咪？

以網上傳閱為標準，而家除咗靠做港聞、幾個財經專欄作家、幾個副刊專欄作家之外，我唔知份報紙可以靠邊個？他日樹倒猢猻散，呢啲人話走就可以走。

當壹傳媒成立之初，完全改變舊有報業生態，令好多舊報紙執笠，我諗肥佬黎諗都冇諗過，佢都會有今日，呢啲karma囉，你殺人人殺你。

*江湖流傳：喺壹傳媒做嘢，唔可以畀肥佬黎見到你同同事交頭接耳，就算傾嘅係工事佢都會鬧到你狗血淋頭（好似有人因為咁炒咗），所以佢哋就算坐隔籬位都會用電話傾工事。我當然無從證實呢啲傳聞，不過我好慶幸我唔使同肥佬黎打工，唔使睇佢面色搵食。

**東方報業集團唔使開心得太早，啲阿伯死得七七八八，相信你重慘過壹傳媒，唔使好多年咖咋。我最怕紙印嘅《東方日報》，嗰陣除難頂到呢﹗我永遠都唔明啲阿伯點可以對住份咁臭嘅報紙飲茶？

寄語台灣總統蔡英文

我小時候去過台灣，對台灣印象很好。對於台灣，我原是沒有資格說三道四的，不過呢，有些話又不吐不快。下面寫的未必討人喜歡，但我完全是站在台灣人利益立場而說的。

一、大部份台灣人根本不是中國人，平埔人和環太平洋島國的原居民一樣，和中國人沒有關係。只有中國人很想鵲巢鳩占台灣才會認親認戚。大清帝國統治台灣的二百一十二年，台灣人漢化不算太深，漢化了的稱熟番，未漢化的稱生番。日治時期的皇民，甚至很熱衷替大日本帝國效力出征中國。台灣人「漢化」，主要是在國民黨據台開始，所以，台灣人把自己想像成中國人，都只是近幾十年的事。

二、無論台灣人漢化多深，台灣人要保障自身利益，最終一定要建國，即是建立類似日本、南韓、越南的國家，將中華民國送回中國大陸。中華民國這個招牌，已經成為台灣人的負累，台灣人要向國際社會解釋自己不是中國人，但是護照上又大書China字樣，這是很尷尬的事情。有些東西，過了時就要變通，否則只會成為障礙。對岸的中國共產黨其實也面對類似的問題，自己既不推行共產主義，也不是無產階級代表，但又要掛著「共產」兩個字行騙，這也是很尷尬的事情。無論國民黨也好、共產黨也好，已經是上個世紀的殘餘物，早該推陳出新，及時扔掉。

三、聞說蔡英文總統有意立法禁止在台灣懸掛「五星旗」，這是很好的開始。將「愛國同心會」這班妖孽人渣和牠們那枝垃圾「五星旗」掃出台灣，是刻不容緩的事。非但如此，凡是中國留學生、陸婦、中國遊客都有政治任務在身，應逐步禁止來台，分批全數遣返。對於陸婦，不能怕拆散大量家庭而待以婦人之仁，因為有更大量台灣人家庭的幸福會毀於她們手上。如若不想分離者，連老公一同送去中國。

 

四、對於那些在中國樂而忘返的台商、投共藝人，就放棄他們吧，等他們可以堂堂正正入籍做個中國人，「分享做中國人的榮耀」。沒有他們和他們的資金，台灣不會死掉的；只有他們沒有台灣他們才會死掉。

 

圖片說明：要脫的始終要脫。

圖片來源：TVBS新聞

為甚麼我不「悼念六四」？

一、據美國的情報顯示，八九六四大概殺了一萬人多一點。殉難的名額就只有一萬多一點這麼多，八九六四之後，其他來不及殉難的人又做了甚麼？我敢講，絕大部份就是向黨認罪悔改，之後像沒事人一般繼續生活，甚至越來越擁護共產黨，覺得共產黨的領導很好，沒有共產黨就沒有今天的生活了。有一種很流行的說法，大意是：如果當年不是鎮壓了民運，就不會換來之後二十年的經濟增長。這種說法很有市場，就連受過高等教育的大學生也真心相信。我不明白當中的邏輯，外國很多地方經濟增長從來都不是依靠鎮壓一場「奴隸向奴隸主要求分權」的政治運動而促成的。就當中國的情況很特殊的確如此，那麼，我希望中國共產黨不停鎮壓中國人吧，反正「群眾事件」無日無之，殺得越多，經濟增長越大，中國自然蒸蒸日上，國運昌隆。

二、香港人或者海外華人，沒有必要因為自己的祖先來自中國就有義務甚至權利干涉「中國」內政，道理好簡單，正如加拿大白人和澳洲白人沒有必要干涉英國政治一般，那是外國的事，於我何干？這是很簡單明白的道理，但是很多人仍然搞不清楚。若果不是中國共產黨利用各種陰謀妨礙香港解殖建國，香港早就是一個和新加坡一般的獨立主權國，新加坡華人有義務甚至權利干涉「中國」內政嗎？如果沒有，香港華人又有甚麼特權干涉？

三、有人認為鎮壓民主運動殺了這麼多人，是一場人道危機，凡有血性者都要關心。若果這種說法成立，我想我全年都會很忙，人類歷史上有那麼多人道危機，為甚麼單單只悼念這一件，而對其他更慘的事就視若無睹？不是很奇怪的嗎？

四、今天的中國人是甚麼人，有甚麼樣的嘴臉，我想不用我多介紹，他們說：「今天還談悼念六四，還有甚麼新意？」的確，二十九年前他們向共產黨奪權失敗，談來也沒有新意，但願中國共產黨永遠統治中國，而他們又永遠逃不離中國，有甚麼比這種局面更令人心曠神怡的呢？這不是比任何「新意」都更吸引的想法嗎？

五、「悼念六四」的活動已經變質，除了變成「支聯會」或「泛民主派」的政治本錢之外，更是中國共產黨散播「中國情花毒」的工具。這已經不是單純的悼念活動，而是一種政治工具，將「你也是中國人」這個精神枷鎖套在香港人的政治工具。公開又好，私下都好，我都覺得沒有分別。

六、以我一向的個人偏見，人死了比人在生過得更好，這種想法我不想說服任何人。不過以此為基礎，我不會悼念任何已經死了的人，我只會悼念未死者，而在中國似乎只得幾個未死者值得悼念。當然，中國的事是中國人的事，又於我何干呢？要我花工餘時間去悼念不是太奇怪嗎？清醒吧﹗香港人﹗放假，就老老實實做放假的事，不要再花時間精神自瀆了。

圖片說明：放假，就老老實實做放假的事。
圖片來源：onaartist

天琦三論

一

對於梁天琦，我係唔信佢嘅。
佢出賣同道嘅事，我冇仔細考究，唔亂講。
不過睇佢同咩人走埋一堆，你就會知佢嘅來路。
由態度判斷一個人，八九不離十，呢啲嘢呃唔到我，我唔中意佢嘅態度，佢只係少年楊岳橋。我相信我嘅眼光，唔會死錯人。
我知我朋友之中係有唔少支持佢嘅，人各有志，我唔會強迫其他人同意我。
大家放長雙眼睇，將來佢一定會做泛民接班人，而家只係做好個「社混」profile。

二

我估個plot大致係咁：中美惡鬥一輪之後，美國食埋香港，美國要用自己嘅班底治港，來來去去都只係泛民主派。但係咁係唔夠嘅，泛民要加返啲「本土」元素，扮代表香港人利益。吸收梁天琦係最好不過嘅辦法，既方便又環保。而家啲左膠見到佢坐監，已經轉晒口風，當佢係最新政治明星看待。好彩嘅話，坐幾年就變天，可以提早出返嚟，到時一句「我坐過監，你坐過未？」已經窒死所有人，國師都要行埋一邊。所以話，政治犯冇白坐嘅監，坐得越耐，本錢越多，佢啲支持者唔知傷心嚟做咩？

三

梁天琦係美國嗰邊啲人，呢件事好明顯，例如佢報考哈佛，又有人拍片幫佢做宣傳，出咗事好多人幫，包括泛民嗰邊啲人同《蘋果日報》；其他義士就唔會有，你死你賤。點解？因為佢哋係真本土囉。

梁天琦原本真係諗住讀哈佛，點解會返香港？佢明知返嚟會受審，而受審入獄機會極高，我好懷疑佢返嚟係接受美國嘅指示，美國要佢寫好份「社混」profile，方便將來委以大任。當你同佢肉赤嘅時候，其實佢坐十年八載，好過你做二三十年嘢。從佢食煙嘅時候流露目空一切嘅態度，佢自覺佢先致係the chosen one，做嘅係大刁，而其他人根本咩都唔係，只係幫手抬轎。

梁游係中共嗰邊啲人，尤其係游應該可以確定。全香港嘅銀行都怕麻煩唔會開戶口畀游，但係中銀就開，如果唔係接到指示點會開？一件小事已經露咗饀。所以，梁游取消議員資格之後，梁天琦唔出嚟幫佢哋站台，據講理由係要準備考哈佛同做paper。事實當然唔係咁，而係各為其主，中共、美帝都各有扯線公仔扮本土派，牌頭雖然一樣，但係主人就唔同。你做你嘅戲，點解要預我？

中共、美帝都部署緊年青一代香港嘅政治代理，而「扮本土派」係「重中之重」。不過睇牌面，中共已經輸咗畀美帝。梁游只係自殺式工具，用完一次之後似乎冇後著，而家兩條友都唔知點算好。美帝指派梁天琦返香港受審坐監，係有長遠打算，為將來將梁天琦捧上重要位置做準備；而且配合各方力量塑造形象。兩者加埋已經收到即時效果，以前左膠、社混圈批評佢嘅人，已經轉晒口風當佢係英雄好漢。中方有的士梁，美方就有梁天琦；中方有游蕙禎，美方就有周庭。以滿足香港人政治戀童癖為標準，美方完全領先中方。中方重可以靠邊個？靠恩恩豬可唔可以力挽狂瀾？佢好似真係一隻豬嚟咖咋。

想買樓忍忍手

香港啲樓價，係用迷湯灌出嚟，當然，又要加埋按需印刷銀紙令貨幣供應大增同埋長期超低息環境啦。不過，後兩個因素會隨住美國進入加息周期而消失。當跌嘅時候，就算再加倍灌迷湯，都只會跌得好急，因為實際上係供過於求。

話供過於求並唔係空口講白話， 「本港單位280萬個，連流動的住戶250萬個，單位多出戶數一成。這個巨大缺口只在私樓出現，至於公屋、居屋的單位僅多出戶數2%和6%。即使容許3、5%的自然空置率，亦仍有達5、7%的『不必要空置率』可從私樓擠出來。別小看這比例，只要計計即知有約十萬個單位。」[1]

唔單止咁，「運房局最新數據指，未來3至4年一手潛在供應量9.6萬伙，較上季下跌千伙，當中未售出單位（建築中但仍未售出或未發售的樓花和積存貨尾）總數再突破7萬伙水平，升至7.3萬伙，創2004年第3季有紀錄以來新高。」[2]而「差估署報告指出，去年私人住宅空置率3.7%，以元朗區空置率為全港之冠，比例高達7.4%，較平均水平高出一倍。」「於元朗區坐擁2個大型屋苑的新地（016），旗下Grand Yoho項目提供1,954伙，一手成交冊資料顯示，項目沽出1,380伙，貨尾約574伙，空置率約30%；同系Park Yoho提供2,375伙，暫沽1,585伙，貨尾約790伙，空置率約33%。」[3]

現有嘅空置單位有十萬左右，再加上未來三四年潛在供應量又有十萬左右，基本上可以肯定三四年之內香港樓市都係供過於求。樓價今日高企，羅家聰認為「很多人忘記了經濟課堂第一樣學的──供求定律。價格由供求決定，但亦反過來影響供求。只要預期樓價必升，本有供應亦會收起來了……。別將之說成純粹的市場現象，這樣囤積居奇多少已有造市成份，還詐看不見？」[1]我自己就唔會簡單將原因歸於某一特定事件，而且，我相信跌市嘅時候，囤積者只會沽埋一份，加速樓價下跌。

所以呢﹐如果你好想今年買樓，不妨博一舖大嘅，即係賭樓價喺美國加息周期裏面易跌難升，畀兩年半時間，賭樓價跌二百萬，博到嘅話，咁即係連本帶利，你隨時慳返三四百萬。兩年你搵唔搵到三四百萬？如果答案係唔得，我覺得係值得一博。博唔到嘅話，帶埋啲錢移民，費事陪佢癲。

點解係畀兩年半時間佢？最新Libor係1.92851（Libor 1 Month，5/8/2018）。今年預計會加多三次四分一厘；假設出年、後年都以每年加四次四分一厘呢速度加息，兩年半可以加二又四分三厘。以最新Libor計，兩年半後利率加到四厘半以上。你諗下，到時銀行同你做按揭，佢要收你幾多厘？收六厘唔係開口夢﹗你又可以諗下，喺六厘按揭嘅環境之下，啲樓價可以點升？


難怪地產發展商咁急，最近我又見到有蟮稿流傳，但凡你見到好多「死慳死抵成功上車」、「父幹母幹貼仔首期」及諸如此類不近人情嘅「新聞」湧現，你就應該知道地產發展商急到瀨，燶味特濃搵你接棒。

[1] 羅家聰：《囤積居奇造市 政府還詐看不見》，見2018年5月4日iMoney。
[2] 《一手供應　逾7萬伙創新高　業界料無助降低樓價》，見2018年04月28日《蘋果日報》。
[3] 《元朗私樓空置率7.4%冠全港》，見2018年04月28日《蘋果日報》。

圖片來源： 《元朗私樓空置率7.4%冠全港》，見2018年04月28日《蘋果日報》。
圖片說明：元朗私樓空置率全港最高，Grand Yoho昨晚燈火疏落，一幢更漆黑一片。方家遠攝。

閒話「陳雲清黨」

要嚟嘅始終要嚟，要講嘅始終要講。今日得閒，冒死講兩句。

「陳雲清黨」唔係新聞，喺本土派發展呢幾年，好多原本係戰友嘅人都變成「叛徒」，其中當然有好多個別又具體嘅原因（據陳雲講，係畀對家收買，我無從證實，亦無從證偽），亦涉及陳雲自己嘅性格。不過我總係覺得，如果你不幸被清算，咁好可能只不過係你唔理解政治。

政治唔係做學問、唔係求知，本身無所謂對錯，只有順逆。每個權力旋渦都有個風眼，你順勢繞住佢，就可以增大佢嘅力量，你逆住個勢，就會削弱佢嘅力量，所以政治只有附和，無異議；對於逆勢嘅同路人，就只有清算呢條路。 好多人同陳雲鬧翻，究其當初，都只係喺一啲小事上意見相左。你要追附一個首領，只可以順，唔可以逆。錯嘅話，情願一齊錯，同歸於盡，共產黨叫呢啲做「黨性」。如果事事據理力爭，呢個係做學問嘅態度，而唔係從政嘅態度。你冇「黨性」，你嗰股政治勢力未成勢，已經畀政敵消滅。所以呢，你問我係點追隨陳雲，我可以講，我唔會百份百同意佢講嘅嘢，有啲係真心唔同意，有啲係我諗唔明，但係我對於我唔同意同唔明嘅，我絕口不提。一個人自己嘅諗法都會隨時間而變，咁唔可以簡單用「今日嘅我打倒昨日嘅我」嚟耻笑，萬物都係流動嘅，一個人唔可能再次踩扁同一嚿狗屎，一個人嘅諗法尚且可以前後唔同，你又點可以妄想兩個人可以完全冇意見分歧呢？對於意見分歧，我只會姑置不論。你係咁意睇過下《周易》都會明：你要清楚知道自己嘅「位」，喺本土派政治當中，陳雲係擔綱嘅，係「君位」，你係追隨者，係「臣位」，臣對於君，有順冇逆，否則不成朝綱。講多次，搞政治唔係學術討論，你分唔清，最嚴重嘅後果可以係死無葬身之地，你唔係畀陳雲整死，你係畀政敵玩死。

不過你又唔好誤會我宣揚愚忠，「追隨陳雲」嘅問題其實可以還原為「點用陳雲」嘅問題。政治只係講攞著數、分豬肉嘅學問，攞著數叫做「利」，分得勻叫做「義」，呢個就係「義利之辨」。你識利用陳雲，小則可以求一己之私利，大則可以得全體之公益。我講求一己之私利，唔係指收錢喺網上抹黑陳雲，呢啲固然係利用陳雲求得一己之私利，但只係偓促小人嘅所為[1]。你將自己嘅私利寄寓於公益，利用陳雲而達到呢個目的，方為正人君子嘅所為。 如果你認為陳雲呢套嘢唔能夠令你得益，你大可以另謀出路；甚至如果你認為陳雲都偏離咗陳雲套嘢，你亦可以將陳雲套嘢據為己有開宗立派。不過就唔好埋怨陳雲清黨，政治原本就只係旋渦發生學。

[1] 嗰啲好憎陳雲嘅人，居然可以花咁多時間盯住陳雲嘅一言一行，甚至收集大量陳雲照片改《老夫子》漫畫，我覺得完全違反人之常情，你憎一個人，點可能有興趣成日對住佢個樣？除咗「收錢做嘢」我真係解釋唔到。

圖片說明：對於被清黨嘅苦主，我係有問必答嘅。

人民幣又要貶值？

尋日有一則趣聞睇漏咗，就係《社科院警告人民幣或貶值保護出口》，內容好簡短：「內地傳媒報道，中國社科院世界經濟政研究所研究員張明警告，中國可能在貿易戰中讓人民幣貶值，以保護出口。」[1]

一個貨幣操縱國要將自己嘅貨幣貶值，只能突如其來公佈，絕對唔可以事先張揚。你講開咗，但官方牌價未改，咁啲人就會一湧而上喺未貶值之前盡快換走你嘅貨幣，散戶係咁、大戶係咁，就連主權基金都會係咁。咁貶值一事就由主動變被動，而且官方牌價變市價。

人民幣貶值，我唔覺得奇怪，因為發行量實在太驚人，我相信就連習近平都掌握唔到人民幣實際發行額係幾多；貶值只係遲早嘅事，我會視之為「支爆」嘅其中一環，其他股、樓都會同歸於盡。

人民幣貶值之後，亞洲各國過去十年就只有港紙冇郁過，企得好硬，掛美金掛到實。香港經濟靠炒樓炒股頂住，裏面空無一物，你認為有咩可以支撐港紙喺呢個位屹立不倒呢？據講係有大量美元資產喺外匯基金裏面，銀行體系又有三萬億港元存款。大鱷要搞香港，好似唔易。不過如果佢哋有本事營造集體恐慌，令到香港人甚至全世界嘅人都一齊湧去銀行換美金，咁又唔同講法，你認為銀行體系裏面三萬億嘅保障就會調轉槍頭攻擊港匯，呢招就係「草船借箭」。

都係嗰句：換定美金等睇戲；如果你真係唔方便持有現金，咁就存喺銀行美金戶口博佢唔執笠。有機會嘅話，再叫啲藍屍世叔伯瞓身做埋人民幣定期，好高息架。

[1] 見2018年3月23日《東方日報》。

論焦土戰

毛孟靜喺《明報》寫咗篇《焦土策略？》耻笑立法會補選期間有人發起「焦土政策」對付泛民，認為「把這套軍事行動套諸於投票行為，不但奇怪 curious、irrelevant 不着邊際，而且是自毁長城 self-defeating 的吧。」「尤其是把己方的票，投向敵對陣營一着，不但沒有化敵營為焦土，簡直是留下房子食物以至雞鴨鵝等供應給對方，等於 quitting one's home territory while leaving behind various supplies for the enemy camp。」

我身為「焦土派第一健筆」，如果唔出嚟講兩句，真係對唔住鄉親父老叔伯兄弟。 毛姨姨，你認為邊個係你「己方」呢？你真係認為已經覺醒嘅香港人重會當你哋泛民係己方？泛民主派騙取香港人嘅信任，由「民主回歸」到「扮本土派」，二三十年，一路走來，始終如一。先騙取民意，再將民意作籌碼向美帝同中共索取各種政治好處，食盡兩家茶禮，屎窟兩邊賣；收到好處之後，就將抗爭引向必敗之地，排除群眾中自發而必勝嘅策略。最終只有香港人最蝕底，永續抗爭而永續失敗；而泛民議員就「保住關鍵議席」，收入豐厚，有車有樓，投票一刻再插香港人背脊一刀。

香港人嘅敵人，唔止有共產黨嘅分支組織，而且重有泛民﹗冇錯，你哋泛民就係香港人嘅敵人﹗你哋絕對唔係己方，而係敵方﹗講得夠清楚未？ 己方同敵方一搞錯，鬥爭必然會失敗，過去三十年嘅香港政治已經好明白說明呢個道理。搞清敵我，再談戰術：香港人唔可能一次過打擊所有敵人，要分清主次，泛民係主，共匪係次。欲救香港，先滅泛民；泛民不滅，香港死絕﹗消滅泛民之後，泛民共匪呢台黑面白面嘅戲碼就冇辦法唱落去，到時共產黨就容易對付——因為一切政治責任將由土共負全責，焦土戰自會進入第二階段。

香港係中國同外國接觸同交易嘅唯一轉換器，之所以唯一，係因為香港有行普通法嘅英式法治，生意上嘅爭拗，洋人都可以喺香港用英文對簿公堂保障自身利益，呢點連台灣都做唔到，何況中國？只要中國共產黨一日執政，中國一日都唔會有法治，冇咗香港，中外好多大刁根本唔能夠成事；亦即係話，中外都靠香港攞著數。焦土戰嘅中心思想，講穿咗好簡單，就係中外唔交過路費畀香港人，咁就一把火燒咗佢，大家冇著數。你認為中外各國緊張啲定係香港人緊張啲？你把握唔到香港嘅真實價值，就唔好講焦土。

順便講句：毛孟靜同范國威都係由泛民拆出嚟係咁意落注喺「本土派」上面嘅小賭注，亦即係「偽本土派」。「本土派」已經玩爛，好好，我哋唔再講「本土派」，而家我哋係「焦土派」，「你哋行一二三四，我哋就行五六七八」，話埋畀你哋知都唔怕，我哋第九步係「焦土」，第十步係「海外建國」。你哋泛民有冇膽跟？跟唔跟到？香港嘅地產商、泛民、土共只要脫離咗香港就乜嘢都唔係，喺地球嘅其他地方，佢哋根本搵唔到食，香港人只要貫徹焦土政策，死得最快死得最慘嘅就係呢班人，咁我哋點可以唔焦土？

圖片說明：票債票償，嚴懲泛民﹗肅清泛民，再殺共匪﹗

唯一嘅出口

唯一嘅出口，就係移民走。

同一個地方，只要角色唔同，心情就會好唔同。例如街市雞檔，買雞嘅人、劏雞嘅人、等劏嘅雞，三者雖然同處一個時空，但三者心情就會好唔同。而喺香港呢個雞檔，共產黨、地產商就係買雞嘅人，賣港賊就係劏雞嘅人，而你，當然只會係等劏嘅雞啦。對於等劏嘅雞，有得走梗係走，走雞先致係唯一嘅生路；其他人同你講咩發展呀一帶一路呀強國勃起抓緊機遇呀通通都只可能係異端邪說﹗

香港後生仔女唔使旨意喺香港繼續生存落去，我咁講唔係因為我要配合中國共產黨清洗香港人嘅政策，而係你哋根本唔夠啲有勢力人士玩，正如等劏嘅雞永遠不敵劏雞同買雞嘅人一樣。壓喺香港後生仔女頭上有三座大山，座座都肥婆咁大份：中國共產黨、賣港賊、地產商。你問問自己，你有乜實力？你郁到邊個？

中國共產黨，叫佢發展生產、造福人類係難上加難，佢哋嘅本質就係一部權力機器，廿四小時日夜運作維持一個強大嘅權力旋渦，呢個旋渦只會冇目的冇意義咁不停自轉，喺受佢影響嘅範圍之內只可能係地獄。本來呢，佢企埋一邊轉飽佢係佢嘅事，不過世事唔會咁理想， 呢個旋渦會不斷擴大，以前就叫「輸出革命」，喺東南亞撞板之後，其實並冇收手，對象只係轉咗去鄰近嘅華人社會，例如台灣、香港、澳門，用民族主義繼續行騙。台灣以前有蔣介石，都叫頂得一下，而家已經完全畀中共蛀穿，連國民黨都講到明唔反共，淪陷只係時間問題。香港同澳門，唔使我多講啦，喺七十年代起已經用計舖排騙局，歐洲人都冇佢符，紛紛奉上殖民地。香港嘅結局最終只會同上海一樣，如果你接受到上海嘅生活，你可以繼續留喺香港嘅。

賣港賊，一大堆老屎窟，坐晒喺政商界中上層位置，個個月幾十萬收入，為咗保住個位，點會唔搖尾？點會唔舐鞋？五十幾歳嗰班嬰兒潮人士重有十年左右先退休，十年後香港賣剩啲咩？唔使睇《十年》你都估到啦下話。 而且佢哋可能已經培育咗第二梯隊，退休移民後又有另一班五十幾歳嘅新老屎窟上位，如果香港重有嘢賣嘅話，佢哋都會繼續賣；而你永遠都唔會上到佢哋啲中高層位置，直到死嗰刻都只會喺畀人賣嘅位置。如果你有信心上到佢哋啲位置，你咪留喺香港囉。

地產商，財雄勢大。你一係永遠住公屋，一係老竇剩落幾層樓或者幾個地舖畀你收租，同佢哋坐埋一條船，如果唔係你就一定畀佢哋生劏。你父母如果已經供滿層樓，你以為可以等收遺產唔使買新樓，但係等到嘅時候層樓已經舊，遲早畀地產商打手即係「乜生」嗰啲收樓公司收樓，人哋放火咖，你唔驚燒死？如果唔等，出去租樓，都係幫人供樓，唔想同人供，唯有自己供，最後都係焗買。呢個就解釋咗香港啲樓價無論炒到幾離地都好都一樣有人買嘅怪現象。你收入少冇首期？咪有人出鱔稿示範叫你父母按埋層已經供滿嘅樓貼落去幫你畀首期囉，銀行好樂意衝出嚟做呢啲生意。重買唔起？咪又出鱔稿話有父母幫仔女供埋層樓囉。再供唔起？咪有咁細起咁細囉。點都幫你上車嘅，所以新樓盤通常好快賣晒。

重有一樣你冇得鬥，就係印銀紙部機唔喺你屋企。各國政府都用印銀紙呢招搶劫平民財產，而中國政府印嘅銀紙，有唔少流入香港買物業對沖人民幣貶值嘅風險。由於好多靠傳統智慧嘅分析員都有意無意忽視呢點，所以都估錯市。只講基本因素而唔講貨幣供應，一心諗住樓市有周期升咗實會跌，根本解釋唔到物業價格有升冇跌嘅現象。所有價值都係相對嘅，貨幣本身都可以視為商品，只要不停印銀紙增加貨幣供應，無論物業嘅內在價值係幾多，只要以貨幣計價，物業嘅價格只會有升冇跌。傳統智慧又話，銀紙印得多，遲早會爆發貨幣危機。少年，你太年輕喇，你知唔知而家啲電腦發展得幾癲？全世界最快嗰部超級電腦就喺中國，你估匪徒喺搶劫之前冇做過沙盤推演？一早搵班精算師、工程師計好晒每年印幾多銀紙而唔爆煲嘅上限啦，重會重複舊馬克同金圓券嘅歷史咩？新時代新形勢：樓價永遠升、貨幣唔會爆，只有你嘅財產不斷縮水。六十年代一層唐樓七百呎都係幾萬蚊，而家差唔多大嘅單位要六七百萬以上，升咗一百倍有餘。好有理由相信，三十年後香港一個同類單位要賣過億。賣過億都係今日個價嘅十幾倍，如果升得急又升一百倍，應該要賣六七億。你夠佢哋玩咪留喺香港囉。

當然，我唔會點你去印度食蕉，要去，都去歐美澳紐呢啲白人主導嘅社會啦，喺呢啲社會，就算做二等公民，甚至做黑市居民，點都好過喺香港或中國做一等奴隸。講到呢度，一定有人跳出嚟話「歐美澳紐已經大把蝗蟲，你去到都係避無可避。」都黐線嘅，冇人叫你移民去華埠，少中國人甚至冇中國人嘅地方一定有。你要縮喺唐人街唔講英文邊個救到你？況且歐美澳紐假假地都係主權國，對中共嘅蠶食最終會奮起反抗。香港唔係主權國，一大班賣港賊坐喺政商界中上層，腿張開歡迎光臨，香港對中國，就好似畀人綁手綁腳任砌一樣，點打？歐美澳紐至少同中國係平起平坐，要打都重有得打。至於台灣，我就唔建議喇，應該好快會「和平統一」，同歸地獄，我唔睇好台灣有咩將來。

上面三伙勢力，你夠唔夠玩？一個你都郁唔到呀﹗何況人哋係三個串埋對付你？香港玩完就玩完，面對現實好冇？天下無不散之筵席。從今日起，咪理公益，只做啲利己嘅事；既唔使坐監，又對自己有益，何樂而不為？後生仔女，學一啲本事、儲一啲美金現鈔、準備好英國海外公民護照或其他國家護照，唔係點你，呢條先係生路，係實實際際唯一嘅出口。

真時代革命——香港後生仔女必讀

以下呢篇文係為移唔到民嘅香港後生仔女寫嘅。

首先聲明：我唔係咩本土派，我係焦土派。唔知點解，最近有班中年人爭住自稱真本土[1]，不過「本土派」已經唔用本土二字好耐，轉咗講城邦，後知後覺者執人口水尾，重自以為好貼市，真係人唔笑狗都吠。

不過今日我想講嘅係真時代革命，時代革命好似過咗時，就好似本土二字一樣，既然都重有人翻講本土，咁我翻講時代革命都唔係太肉酸嘅，最多畀狗吠啫。時代革命嘅精髓係咩？咪就係「當獨裁成為事實，我就去報讀哈佛」囉，當然啦，又唔係個個都咁易報到哈佛嘅，移唔到民、報唔到哈佛，咁點算呢？唔怕，大丈夫能屈能伸，棺材房都可以變龍床，我哋重可以搞個「真時代革命」﹗

犯法嘢我就唔講喇，好似「暴動罪」呢啲咁得人驚嘅罪行，非常唔值得鼓勵。與其暴動，不如全面撤出社運重好喇，放手任由香港爛落去，方為真焦土。點解要愛香港呢？尤其香港只係一件死物，而且樣樣講錢，亦從來冇愛過任何一個人。

「真時代革命」完全係和平、理性、非暴力、非粗口嘅運動，不過呢個運動唔係老駱講嘅「新時代革命」，佢只不過叫人「不讓座、不捐血、不買旗」[2]，做咁小事算咩英雄好漢呢？我哋都係啲做大事嘅人，點會滿足於呢啲咁小嘅成果呢？

「真時代革命」係為香港新一代度身訂造嘅不合作運動，喺呢個水深火熱嘅香港社會，香港土生土長嘅後生仔女連新移民都不如，唔會有社工、左膠、工聯會幫你；做得辛苦人工又少，想去吓日本旅行透吓氣都有個地產商個仔走出嚟喝住你，叫你畀晒啲錢佢使。晉升無望，而樓價就升唔停。有人已經從政治經濟學嘅角度懷疑呢個只係統治階級嘅詭計，「維持香港人僅僅夠糊口但做餐懵，似乎係回歸後政府想營造嘅社會氣氛，因為一旦太多人得到經濟自由，就會失去一班營營役役嘅順民。」[3]

當社會流動同世代更替都失效，「戰後嬰兒」嗰代食盡四代香港人利益[4]，再順手出賣香港畀中共或者美帝，後生仔女基本上冇可能反抗，向前行唔得大可以向後退，使出一著虛招陰你嘅對手，就係「坐定定響度，乜都唔使做」：「唔返工、攞綜援、輪公屋」，呢個先係致勝之道。如果你屋企咁啱有啲錢，你搬開一個人住就可以參與，更加可以坐喺度等繼承家產，自由自在過日辰；做嘢，都係留返畀老人家優先做喇。只要所有奴隸都怠工，整個奴隸制就會瓦解，既唔犯法，亦冇風險，而且穩賺必贏，「無成本，又可以玩野，點解唔做？」咁好嘅路，全香港只有我李綺玲一個指畀你行。

[1] 屈穎妍：《我們是香港真本土》，見2017年05月02日《頭條日報》。
[2] 老駱：《新時代革命：不讓座、不捐血、不買旗》，見2016年12月02日《聚言時報》。
[3] 高明：《上岸上位越來越難》，見2017年5月8日《蘋果日報》。
[4] 參考呂大樂《四代香港人》一書。據內容簡介講：「香港有四代人，生長於戰前的是第一代，依次直推至1990年誕生的第四代。呂大樂以精闢的透析力和高度的概括力，道出四代人的精神面貌，並令人不無警惕地指出，在安分寬容的第一代陸續退下舞台之際，『戰後嬰兒』卻未能為下一代提供更開放、更公平的環境，以致第三代人深感出頭無期，而第四代人打從開始便是輸家。」社會流動失效嘅實例亦可參考註[3]高明一文。

繁簡之爭就是政治之爭

 「繁體字」是自然發展而來的，除了共匪控制的「偽中華人民共和國」淪陷區和投共政權之外的自由世界，直至今天還在廣泛使用，從來就沒有間斷、沒有過時。相反，「簡體字」是一種由政權主導的人工造字，雖然有不少字來自古字、民間俗字、草書邊旁，但是更多是強行捏造，尤有甚者，「簡體字」將多個同音字合並為一個筆畫較少的字，導致今日用電腦進行「繁簡轉換」時出現大量錯誤，改不勝改。如果沒有政府強制推行，根本就不會出現「簡體字」。所以，「繁體字」才是漢字自然發展的最新階段，而且自晉代以來已經保持穩定沒有大變。

廢除「簡體字」、恢復「繁體字」並不是復古，而是去偽存真。如果妄圖以「首先恢復篆書，然後是甲骨文，這才是真正的回歸」這種論點駁斥廢除「簡體字」、恢復「繁體字」，以為這樣可以用歸謬法進行反駁，那只能暴露出自己的無知。

中共推行「簡體字」的最終目的是廢除漢字，改用拉丁字母，這是五十年代的政策，原初的政治目的是希望新一代無法讀懂四九年之前出版的書籍，只能讀中共的出版物，達到控制輿論的效果。這是不便燒書的情況下另一種類同焚書坑儒的權宜之計。不過，由於未能完全消滅各地「方言」，所以拉丁化只能半途而廢，令新中國人停留在使用「簡體字」的中陰狀態。廢除「簡體字」、恢復「繁體字」之所以是去偽存真，就因為中共這個由蘇聯扶殖的境外政權推行「簡體字」只是為了消滅中國文化，塑造一種「社會主義新人」、一種新中國人，而新中國人只能是一種蘇聯模式的偽中國人。

當然，必定有人反駁說秦代李斯以小篆取代六國文字，亦是政府強制推行，共產黨強制推行「簡體字」消滅「繁體字」，有何不可？確實沒有甚麼不可以，既已獲得政權，就能為所欲為。你認同這種「文字改革」，那你就用「簡體字」吧，我就「義不帝秦」了。

又有人會這樣反駁：任何字都是人造的，自然發展出來的文字和文字改革委員會製造的文字，都只是人造物，「繁體字」沒有比「簡體字」優越的凌駕性。況且，李斯以大篆為基礎，吸收齊魯等地的蝌蚪文，造出一種勻圓齊整而又簡略的小篆；程邈破壞古體，創造隸定。二者都是個人的捏造，小篆、隸書也和「簡體字」一般非自然生成。既接受小篆、隸書，為甚麼不能接受「簡體字」？這種講法也說得通，那你就用文字改革委員會為新中國人造的「簡體字」吧。

 

宏觀點看，繁簡之爭就是政治之爭，是左和右之爭，是相信人類可以用理性創造出美好新世界還是相信人力不應胡亂干涉天道之爭。我是右派，我相信後者。過去百多年的歷史證明，凡是右派主導的地方，人民的生活都比左派主導的地方好。

 

我真心希望中國共產黨能夠成功在全國推行「普通話」，然後將漢字「拉丁化」，廢除「簡體字」。那麼，夷夏之辨就容易得多。新中國人這種偽中國人，頂著「中國」這個招牌在世界各地招搖撞騙，已經去到令世人無法容忍的地步。如果新中國人都用拉丁字母拼寫「現代漢語」，其他真中國人寫漢字，那就很容易分清真偽，對世界各地人民和真中國人都是莫大的保障。

 

圖片說明：很多新中國人都很滿意「簡體字」，不過其他國家就會將繁體字手到拿來，據為己有。

短評「大灣區」與港人跳海

最早公開講「大灣區」嘅應該係四月十七日《人民日報》海外版一篇叫《想上粵港澳大灣區的車？要快》嘅文章，文中特別提到梁振英「苦口婆心」叫香港人就範「上車」。[1]四月十九日，梁振英「率領行政會議非官守議員、策略發展委員會和經濟發展委員會委員考察粵港澳大灣區城市群的廣東省城市」，「隨行還有政務司司長張建宗、財政司司長陳茂波、政制及內地事務局局長譚志源、環境局局長黃錦星、創新及科技局局長楊偉雄、發展局局長馬紹祥。」[2]呢兩日，港共政權啲狗官繼續為「大灣區」宣傳：財政司司長陳茂波話「浸溫泉唔使去日本」，去恩平浸就得[3]，「香港人可選擇到大灣區的城市居住或退休」[4]。政務司司長張建宗就話「大陸安居係港人生活一部份」[5]。

當然，所謂「大灣區」就同之前講嘅「發展大西北」、而家講緊嘅「一帶一路」性質相似，都係啲「如果做得成一早就做咗、如果做唔成點講都冇用」嘅事。好似香港同廣東合作，一早已經做咗；要搬去廣東住嘅香港人，一早已經搬咗，或者已經死埋；啲靠廣東「做廠」發財嘅香港人，一早就發咗財，甚至已經發完財走埋。咁重講「大灣區」嚟做乜呢？

如果孤立嚟睇政府嘅政策，你係唔會明白背後嘅動機；必須通盤咁睇、唔同政策夾埋嚟睇，你先睇到個big picture。我就估計係同人口換血最有關係，而且係透過清洗公屋裏面嘅草根階層達到目的；而利用香港人嘅民脂民膏扶持由新中國嚟嘅移民又一路做緊，已經唔係新鮮事物。 [6]。草根階層比起離地中產更有香港特色，而且佢哋走唔到，又佔住公屋，唔似離地中產有乜事可以一走了之。要消滅香港人同時又騰出公屋容納新中國人，點可以唔「斬草除根」針對公屋住戶呢？以下呢篇文就講出清洗公屋基層嘅具體做法，值得一讀：

「舊年11月初，本欄寫『辣招令樓價再升一成』，以中原城市指數計，目標升至158點。當時指數為143.49，加辣近半年樓市幾乎有升冇跌，最新公佈點數為152.77，升幅達6.47%。當然，如果計埋指數以外嘅新盤同公屋成交，樓市一早升超過一成，但本欄冇打算搬龍門。

可以肯定，只要冇宏觀大事發生，例如美韓核戰，又或聯儲局宣佈一次過加息一厘，本欄預言到價係遲早嘅事。

點解咁肯定？因為中資已經落疊天價投地，成為高樓價集團嘅一份子。香港政府絕對唔會推冧樓市，反而會配合：連番加辣削減二手供應，挾高樓價；即將進行申報嘅踢走公屋富戶政策，將會為樓市帶來新一輪購買力，確保他日中資落成賣樓時，樓價仍然高企。

最近兩個公屋王已經係先兆。沙田公屋顯徑邨賣500萬元；黃大仙竹園北邨綠表以306萬元成交。

非公屋用戶一般甚少會買返公屋，因為住宅地址本身有身份象徵。公屋雖然係特權，係人都想有間公屋，但始終住公屋代表基層，冇人會問你嗰間係咪天價公屋，只會客觀知你係住屋邨，唔係住開好難跨出一步去用天價買。

公屋本身嘅好處係實用，唔會有私樓嗰啲無無聊窗台或者發水面積，而且舊屋邨發展成熟。非物質嘅優勢，則係本身有親人住喺同一屋邨，方便湊細路。

但最大誘因應該係公屋富戶政策收緊，今年10月開始申報，唔合格要踢走，逼最後仍然保存購買力嘅人，即係公屋富戶投入市場。

公屋住戶個個月贏在起跑線，租金壓力超細，原本唔富，住落幾年都變富戶，遲早都會超標，床下底儲埋一大嚿錢，一係自己買，一係幫下一代畀首期，以免第時被趕走。

大家可能會問：炒到公屋咪好似股市炒到三四線股，樓市仲唔爆煲？公屋富戶隱藏大量財富，將會因政策而䆁放，幾單天價公屋成交令沉睡嘅富戶資金蘇醒，越近申報期越多顛價公屋成交，令香港樓市繼續『市底強、市面都強』。同一番話等市面轉弱先再講啦。」[7]

港共政權谷公屋富戶出嚟買私人樓，保障高價投地嘅中資幾年後嘅賣樓收益，其實都好有可能，一啲都唔值得奇怪。之所以中資高價投得地，唔係走資，而係因為佢哋知道外面唔知嘅嘢，例如政府政策，甚至佢哋根本就係喺背後制訂政策嘅人。

我真係驚香港啲樓可以再升多一倍，只要政策得宜，想揸乾香港人啲油水絕冇難度，反正香港人喺長期法西斯式管理之下，已經馴服到任何事情發生都唔會反抗，最多咪踎喺度喊，就係得咁多。

如果公屋富戶幾年後買唔起樓，咪「返大陸」囉。你一係買樓畀錢中資賺，一係移民海外或者「返大陸」共享「大灣區」嘅光榮，呢個似乎係香港人嘅終極選擇，我已經唔寄望可以喺政治上解決問題。香港人，係抵死嘅。

[1] 「香港能否搭好大灣區這班車？鑒於香港過往泛政治化、逢融合必反的傾向，不少人也表示了擔心。有香港媒體指出：反對派逢與內地合作必反，已到了走火入魔的地步……如果這次反對派再處處掣肘，香港勢必被徹底邊緣化，那才是最大的悲哀。香港特區行政長官梁振英曾經引述國家領導人的話呼籲港人珍惜發展機遇：“全世界都想搭上中國的發展列車，別人要排隊買票，而在‘一國兩制’下，港澳不用，國家還給你預留座位。”苦口婆心、掰開揉碎，肺腑之言，希望香港民眾能入耳入心，機不可失，時不再來，想上車，要快！」見2017年04月17日《人民日報》海外版。

[2] 《梁振英出席粵港澳大灣區座談會》，見2017年04月19日《香港政府新聞網》。

[3] 《陳茂波硬銷大灣區　「浸溫泉唔使去日本」　旅遊達人：係咪搞爛gag 》，見2017年04月24日《蘋果日報》。

[4] 《陳茂波：市民可移居大灣區城市》，見2017年04月23日《now新聞》。

[5] 「張建宗說，除了政治經濟以外，內地與香港在社會和民生事務上亦息息相關，現時在廣東省長期居住、工作及升學等的香港人已超過52萬人，兩地人文交往亦愈來愈頻密，而當中不少有趣變化，如過去20年，『過埠新娘』由超過九成的比例慢慢下降，至2016年，約有三分之一是『過埠新郎』。」見《多咗港女嫁大陸男　張建宗：大陸安居係港人生活一部份》，2017年04月23日《蘋果日報》。當然，呢啲數字唔會話畀你知，嗰啲「港女」好可能喺不久之前其實只係新中國人。

[6] 「消息指當局訂出貧窮線後，計劃優先扶助來港不足七年、無法領綜援且要照顧子女的家庭，然後依次援助在職貧窮、有高齡及殘疾人士的家庭及清貧長者。」見《優先扶助新移民家庭》，2013年09月28日《太陽報》。

[7] 高明：《天價公屋的啟示》， 見2017年04月23日《蘋果日報》。

圖片說明：香港人，呢次跳海都唔掂。

保護資產速換美元

林鄭月娥當選下屆特首之後，《明報》李先知專欄文章指出：「有建制人士表示在『兩會』後已經有指中央對王冬勝任財政司長開綠燈，亦流傳即使他曾為曾俊華向中央呈交有意參選特首的信件，仍然得到中央信任。」[1]

王冬勝

王冬勝喺一四年底已經建議業界研究人民幣全面取代港元嘅可行性，「稱有三個方向可以研究，包括港元跟美元脫勾，完全自由浮動；港元與人民幣掛勾（若人民幣將來可自由對兌）；以人民幣完全取代港元。他表示，對何種方向未有傾向，希望業界研究討論。」[2]其實業界亦無從討論，因為以人民幣取代港元，似乎係中共國策。自一三年以來，中共嘅「國務院」已多次討論，而且有埋時間表，預計喺二零年就可以推行。[3]外間可以討論啲咩呢？王冬勝話「有三個方向可以研究」，其實並冇三個方向，只有三個步驟通向一個唯一嘅方向，所謂「對何種方向未有傾向」只係空談，幫自己戴定頭盔而已。由於實際上唔會有任何討論空間，故此亦唔見業界嘥時間去討論。

稱有三個方向可以研究，包括港元跟美元脫勾，完全自由浮動；港元與人民幣掛勾(若人民幣將來可自由對兌)；以人民幣完全取代港元。他表示，對何種方向未有傾向，希望業界研究討論。

- See more at: http://news.memehk.com/posts/%E7%8E%8B%E5%86%AC%E5%8B%9D%EF%BC%9A%E7%A0%94%E7%A9%B6%E4%BA%BA%E6%B0%91%E5%B9%A3%E5%85%A8%E9%9D%A2%E5%8F%96%E4%BB%A3%E6%B8%AF%E5%85%83#sthash.oUQOoELM.dpuf

中共喺咩時候會用人民幣取代港元呢？除咗《基本法》講明一國兩制會喺二零四七年終止而港元會廢除之外，中共亦會睇實際需要同取消港元嘅後果，衡量利害之後先致會行動，所以，小市民亦要花啲時間猜吓用人民幣取代港元對中共嘅利弊，從而估計你副以港元計價同儲存嘅身家有幾耐命，只有牛馬先會識做嘢唔識死。

先講吓取消港元嘅後果：

一、香港嘅發鈔權取消，你只能用中共印嘅人民幣，你亦無從得知中共印咗幾多人民幣，而以印鈔搶劫民間資產已經成為中共慣常嘅做法，高通貨膨脹係必然結局。

二、香港利率由中共操縱，唔再由銀行公會因應香港實際需要而決定。即係香港嘅實際經濟需要唔可以透過以調節利率作貨幣政策上嘅操作應對，要香港嘅經濟需要遷就中國甚至只係中共嘅經濟需要，實際上係收縮香港嘅自治權。

三、港元嘅支柱係外匯基金，理論上港元只係美元喺香港嘅代用幣，就好似賭場嘅籌碼、遊樂場嘅代用幣一樣。取消港元之後，外匯基金就唔使再支撐港元，可以作其他方面嘅投資，例如：好穩健又回報高「中國國債」。 

四、你以畢生精力買嘅嗰層樓唔再以港元計價，而係以人民幣計價，你終於可以分享到做一個中國人嘅光榮，我真係恭喜你呀﹗﹗

五、如果人民幣因發行過多而下跌，由於香港大部份消費品尤其係食物靠外國進口，所以會瘋狂加價，到時有錢人先可以食進口食品、用外國貨，窮鬼包括沾沾自喜嘅中產只能好似大部份新中國人一樣食中國嘢用中國嘢，你又一次分享到做一個中國人嘅光榮，我真係恭喜你呀﹗﹗

講住呢五點先，已經夠晒驚嚇，如果你諗到其他，歡迎補充。

再講吓取消港元對中共嘅利害：

一、上邊講過，只要取消港元，就可以將香港致於死地。既收咗你嘅財權，亦呃晒你啲外匯基金。香港之所以可以有「一國兩制」，係因為香港喺九七前有錢，又有洋人撐腰，點都要畀返幾分薄面；只要搞到你窮，甚至搞到你靠佢開飯，你就自己跪低，所有之前講嘅嘢可以唔算數，亦唔使再喺你面前做戲。呢個係中央政府消滅地方勢力嘅慣用法，萬試萬靈，就算係以前有東方巴黎之稱嘅上海，一樣係一夜熄燈，從此喺文明世界裏面消聲匿跡。如果香港繼續有錢，而中國經濟又走下坡，咁「分裂勢力」一定會更加「猖狂」。「消滅於萌芽狀態」係「維穩」最低成本做法，點會唔做？

二、當然，中共同埋佢地啲狗官都有好多資產喺香港，佢哋完全意識到資產以港元計價即係以外幣囤積咗資產，非常安全。取消港元，就少咗一個國外嘅避風塘；所以，好有理由相信，佢哋會將手頭上嘅資產向香港嘅銀行抵押套取港元再換成外幣調走之後先會推行以人民幣取代港元嘅政策。王冬勝話：「中央有意在2020年前將上海打造為國際金融中心，因此可視2020年為人民幣自由兌換的指標。他認為，現在是適合時間去討論港元的定位問題。」[4]時間亦與《動向》雜誌所講嘅吻合。即係如無意外，中共會喺三年之內完成呢類資產轉移。

除上述兩點之外，當然會有其他考慮，但係講兩點已經夠驚心動魄。

小市民點樣喺取消港元政策之下自保

一、唔好買樓。不動產係長線投資，香港已經冇任何長線投資嘅價值。發展商越係用盡旁門左道急於賣樓套現，我越係聞到陣陣燶味，聞到燶味嘅唯一自救方法係立即走人，而唔係買嘢。當情況緊急，再賣樓套現好困難，就算有人買，都一定畀人殺價。

二、得閑就換定美金現鈔，唔好後知後覺見到銀行大排長龍先致換，太遲。喺中國嘅情況係限你每年換五萬，而且銀行職員通常話冇現鈔，要約期。唔好以為開美元或其他外幣戶口就好安全，緊急關頭你未必攞得返啲錢，親生仔不如近身錢，我講嘅係換美元現鈔，係現鈔﹗現鈔﹗現鈔﹗﹗

三、平時支出用八達通搭信用卡，唔好保留太多港元，亦唔好留太多錢喺銀行戶口，只要出糧後期期找清卡數就冇問題，保持你爭銀行錢而唔係銀行爭你錢嘅良好習慣。


四、除咗美金之外，金銀都係唔錯嘅選擇，我講嘅當然唔係強國出嘅熊貓金幣或唔知乜紀念幣啦，而係英美澳加等國出嗰啲。

五、準備好護照，最好係外國護照。BNO係英國護照，只係一種冇居英權嘅二等公民英國護照，全世界咗「偽中華人民共和國」之外，其他國家都承認。次等選擇只能夠攞「香港特區」護照，呢本係中國護照，全世界都會視持有人為中國人，務必注意。護照有咩用？就係如果你有一日不幸要做難民話，外國政府要識別你嘅身份，唯一憑據就係護照，所以唔好再相信「護照只係旅行證件」呢啲邪說。又如果你去嘅國家要遣返難民嘅話，持BNO者只能遣返英國，持「香港特區」護照者就只能遣返「中國香港」。你要多謝邊個好呢？當然係九七淪陷前支持「民主回歸」嘅司徒匪華同支教民啦。願司徒匪華永墜地獄﹗願支教民全體仝人都落地獄﹗


[1] 《明報李先知：財爺人選王冬勝傳已獲中央點頭》，見2017年3月27日《明報新聞網》。 
[2] 《王冬勝：研究人民幣全面取代港元》，見2014年10月31日《謎米新聞》。 
[3] 見2015年5月《動向》。參考附圖。
[4] 《王冬勝：可考慮將人民幣全面取代港元》， 見2014年10月31日《852郵報》。

海外香港建國之我見

香港喺海外立國，唔係今時今日先有人講。九七淪陷前，好似黎智英都講過，當然，最後不了了之。因為佢唔會真係實行，講出嚟，只係動搖港人「回歸祖國」嘅信心，拋吓共產黨，為英美攞談判籌碼。

不過國師陳雲講就唔一樣，可以係虛，又同時係實。而家距離四七年一國兩制結束只有三十年，大有九七前末日迫近嘅景況。挪亞方舟建造需時，講得嚟就啱咖喇。國師話：

「香港人海外建國。華人海外建國，有先例的，明的有蘭芳共和國（在北婆羅洲）、新加坡，暗的有泰國（有華人血統的王室）、汶萊（華人王室）、台灣（未完成）。目前的可行之法，是與某些英聯邦國家商量，在一個縣的地方預備建立自治州。英聯邦國家的語文、法律和傳統容易適應香港人。在太平洋區的小國也可以，在台灣、日本、泰國、馬來西亞、印尼也可以。

開始的時候不必獨立主權的，與收容國取得協議，只要香港移民人口佔大多數，與當地居民取得共識，就可以用人口和財力、發展潛力，主導議會，之後在國會通過立法，使該地成為香港人的自治州，再進一步成為獨立主權國，與收容國建立邦聯關係，香港人的海外國有自己的憲法、國名、國旗、國家語文和象徵式的軍隊。這其實是香港城邦論的海外版本而已，只要與收容國取得默契，循序漸進，一點也不困難。

這是香港人的《出埃及記》，離開埃及的暴政，也擺脫那些出賣香港的賤民，不再與這些日日撞口撞面的賤民為伍。我要等待上帝的感召。

取得海外根據地之後，可以建立香港人學校和社區，令海外港僑子弟有地方學習及發展事業。海外建國計劃可以保存香港的文化實力、財力和精銳人口，將來支援香港，香港革命成功或與中國協定，成為自治領之後，可以與香港本部建立邦聯關係。」[1]

我以前都講過吓呢個問題，以下講吓我嘅意見：

一、 關於選址，揀英聯邦國家係最啱嘅，因為東南亞好多地方已經有人滿之患，要佢哋容納一大批異類，確實好困難。而且以取得自治州開始，大有鵲巢鳩占嘅意味，一定會遇到好大阻力。況且好多呢啲小國都怕咗中共，一早就投咗共，又點會做呢啲中共唔想見到嘅嘢呢？環太平洋島國地方太細，不足以立國。英聯邦國家話晒都係遠在天邊嘅英國主持大局，睇返近排同英國同美國越行越近，將來對中共只會更加強硬，唔會再睇中共面色做事。

二、英聯邦國家之中而又氣候溫暖嘅，以澳洲地方最大。我比較屬意西澳洲，嗰度氣候乾燥，草都冇條，人都唔多個，可以避免同已經居住喺度多年嘅人爭地方而引起衝突。而最好嘅方式，係向澳洲政府租借廢礦場，呢啲地方，根本冇人住。同澳洲政府磋商，以每年稅收若干百份比作租金，如果虧損就免租一年。喺澳洲建立租界，對澳洲亦有好處，除咗租金收入之外，單單對本土農產品嘅需求已經十分可觀，而其他建設時帶動嘅工商業景氣，亦可以為澳洲經濟注入龐大動力。想像吓每年香港生產總值嘅百份之二有幾多？建造一個全新城市產生嘅生產總值有幾多？我諗對澳洲亦有相當吸引力。

三、喺廢礦場重建香港，係無中生有，所有嘢重新規劃，可以避開香港而家難以解決嘅問題，例如垃圾焚化爐選址爭拗。由一開始已經建造北歐或日本水平嘅焚化爐，做好垃圾分類同回收工廠，喺問題未出現前就將佢解決。其他如供水、供電、交通、污水處理等，由規劃呢步就解決咗，呢個就係由空白一片開始嘅好處。而且廢礦場就有大量石材可用，就地取材，毋須遠路運輸。城市規劃方面，由於係白紙一張，咁就可以趁呢個機會重建維多利亞城為舊城區，體現香港獨有文化，又可以以此作招徠發展旅遊業。由於人口唔會好似而家香港咁多，所以大部份建築都可以得三四層，唔似香港而家咁有壓迫感，重可以專起維多利亞式同愛德華式建築，重現百年前香港最靚嗰面。另外，廢礦場通常有個巨坑，可以改造為蓄水池，發展淡水養殖業。

四、礦場一般以鐵路運輸礦石去沿岸碼頭，租界應包括原有呢啲設施。以鐵路連接碼頭，有啲九廣鐵路嘅意味；再在城中建造電車路，就似十足港島嘅布局。火車迷、電車迷到時唔單止剩得個睇字，而且可以大展拳腳，以六十年代嘅技術已經可以應付日常需要，火車、電車最緊要好玩，單單好玩，已經吸引人嚟睇嚟坐。岸邊可以建立海水化淡廠，既可以提供食水，又可以提供食鹽。亦可以發展海產養殖業，建造人工魚礁，既提供海鮮供飲食業之用，又可以供人潛水觀賞。

五、人口來源除咗經審查嘅香港人之外，亦歡迎海外華人申請，尤其係舊香港人、老華僑。要提防中共特務滲透破壞，一概唔批持中國護照者入境。

全盛時期嘅古希臘城邦，人口不過幾十萬，而且唔少係奴隸。拉斯維加斯亦係喺沙漠無中生有。雖然而家發夢發到西澳洲，但係唔好睇少白日夢嘅威力，「天下大事，皆作於細」，好多驚天動地嘅事，都係由一個一閃而過嘅念頭開始。

 [1]見2017年3月25日facebook。

圖片說明：人生有幾多個十年？與其消磨喺共產黨同賣港賊上面，不如去西澳洲重新開展有意義嘅人生﹗

淺談點做一個末代賣港賊

賣港賊可恨之處，不在賣港，而在於佢哋比其他人醒覺得早，一早發覺完全唔值得為香港人犧牲，只有出賣香港人嘅事值得做。有啲年紀大嘅賣港賊，喺上世紀八十年代已經賣港，而元祖賣港賊司徒匪華當然更早——願司徒匪華落地獄——手慢嘅，九十年代先參加賣港，呢批人，唔少搵夠之後就喺九七淪陷前移民，喺外國頤養天年，家財萬貫，身體健康，而且子孫各有成就。人生，本來就應該如此。九七淪陷後先參加賣港嘅，確實係反應遲鈍，但係香港未死透，仍然可以把握最後機會衝刺，上有官商名人，下有地痞流氓，青關愛港、黑警藍絲，變態無窮，都想喺香港過期前榨取最後剩餘價值，其志可嘉。

我係舊年九月選舉之後先醒覺嘅，固然係後知後覺，係抵死嘅。賣港嘅人，首先要痛恨香港，仇視每一個香港人，咁先致賣得理直氣壯，畢竟良知作怪，如果你覺得對香港或者香港人重有感情，你又點會參加賣港投共嘅勾當呢？對香港同香港人嘅厭惡，喺舊年九月最終培養好，多謝！！可惜賣港賊眾，已無我容身嘅位置，可憐！！

同我有相同處境嘅香港人，尤其係後生仔女，相信都唔少。只能夠畀司徒匪華、支教聯同左派出賣，而冇親力親為賣港嘅機會，呢個就係生得遲嘅不幸，生得早，就算唔賣港，喺九七淪陷前出身，點都搵到啲錢，好彩嘅話買埋樓，搭資產價格暴升嘅順風車，一早已經可以賣樓結帳離開香港，頭也不回安心移民，含飴弄孫，閑時教訓香港人要熱愛祖國，真係人生一大樂事，光輝人物有謝志峰。既然余生也晚，錯過呢啲大好機會，都要有應對將來遭逢巨變嘅方法，先致係安身立命之道。好在賣港係一條光明大路，而賣港亦唔一定要投共，撒手唔管，實行焦土政策，亦係一種消極賣港圖利嘅好方法。

具體方法如下：

一、全面撤出社運，空出主場，畀共匪同泛民全面進場，等睇佢哋自滅。呢個係國師所授錦囊秘笈，唔使我多講。

二、減少消費，盡量搵錢，有閑錢就換做美金或買金，記住，係美金現鈔，唔係開美元戶口。因為有乜事，你係會攞唔返啲錢嘅。尤其唔好買樓，不動產喺緊急關頭好難脫手，而且無論係住宅單位或地舖已經有唔少蝕讓紀錄，基本上發展商食盡所有利益，冇水位畀買家賺錢。佢哋越係出盡旁門左道賣樓，我覺得燶味就越濃。物業留返畀新中國人同中資機構買啦，一個浪冚埋嚟，佢哋自然會傾家蕩產。空出香港呢個地盤，畀新中國人做葬身之地﹗

三、如果你已經有相當工作能力，好好；如果冇，盡快學一啲本事，你要學識一啲維生技能，係高係低並唔重要，最重要係外國需要你嘅技能，畀人哋一個收留你嘅理由。

四、準備好護照，有外國護照就最好。有一點要留意，BNO係英國護照，除咗「偽中華人民共和國」唔承認之外，全世界都承認。護照唔係旅行證件，係各國識別一個外國人身份嘅證件。就算過咗期唔續，有咩事走難都要帶喺身，護照可以過期，國籍冇得過期。無論你本BNO護照過咗幾耐，英國政府都會為你續期。假使做難民，你攞住本過期BNO，點都好過一本未過期嘅特區護照。同樣被遣返，持BNO會去英國，持香港特區護照只能去香港。

五、如果你遭受政治迫害或政治檢控，恭喜，請即攜帶相關證據到就近嘅美國領事館尋求政治庇護，呢樣都係國師教嘅。請注意，證據十分重要，唔係講吓就會畀政治庇護你；如果未走住，亦要保留相關證據。

六、了解吓各國難民政策、退路交通。如果外國有親戚朋友照應，亦要妥善安排一吓。

七、至於香港最終建國？定係喺英聯邦國家租地重建？定係徹底畀北方蠻夷消滅？來日方長，將來先算。

八、一切準備就緒，安心返工，放假時載歌載舞，等大日子嘅來臨。

圖片說明： 做好準備，載歌載舞，生活愉快，等大日子嘅來臨。

中共覆亡的沙盤推演

最近中華民國國史館在網上公開了五萬份蔣介石的檔案，其中一份致當時台灣省主席陳誠的電報最矚目。[1]電報上說：「台灣法律地位與主權，在對日和會未成以前，不過為我國一托管地之性質，何能明言作剿共最後之堡壘與民族復興之根據也？豈不令中外稍有常識者之輕笑其為狂囈乎？」這則電報的內容已經不是新聞，年多前陳誠史料轉交國史館後，這電報是「最常被台派學者引用的一段話」。[2]不過，結合近期的局勢發展，總令人覺得網上公開在時間上配合得很好。

最近東亞還有甚麼事呢？有：日本駐台機構「日本交流協會」正式改名為「日本台灣交流協會」[3]；日本海上自衛隊兩艘戰艦訪問菲律賓[4]；俄羅斯反潛驅逐艦訪問菲律賓並加強海軍合作[5]；美軍宣布將在亞太地部署新型F-35戰鬥機[6]。列強都在「偽中華人民共和國」四周眉來眼去，圍堵之勢——甚至可能是圍毆之勢——已成，只待時機一觸即發。

另一邊廂，中國可能強制國企結匯[7]，也放出風聲說應容許人民幣一次過貶值[8]，都說明了中共的貨幣危機已經去到了水深火熱的地步，為了保住政權，最終可能走上「北韓化」的鎖國之路。而這次貨幣危機，我相信是美國要結束中國這個「世界工廠」的最後一著，經過多年部署，將原先購買中國貨的定單引導到其他發展中國家之後，誘發一次金融危機狠狠打擊「偽中華人民共和國」，令牠一沉不起，再利用財技甚至法律收割在混亂中由中國流出的民脂民膏，吃盡中國的「人口紅利」。

自大清帝國覆亡之後，繼承中國之弱勢，所有在中國建立的政權，都或多或少受外國勢力所擺佈。無論是國民政府還是中國共產黨，都只是外國勢力的代理人；中華民國和「偽中華人民共和國」都只是些衛星國。那個由蘇聯扶植的「偽中華人民共和國」在五零年代和蘇聯鬧翻之後，強忍了孤立十多年，到七十年代終於打破僵局和美國建交，自此外交一帆風順，受多國承認。佔領了中國，如果不能把中國的資源尤其是廉價勞動力出賣變現的話是沒有意義的。中共不是將中國人賣給蘇聯，就是賣給歐美，沒有其他選擇可言。美國也樂得有兩國中國隨其需要好像電燈的開關推上拉下佔盡不同時勢之下的便宜。大家有幸將會在不久的將來有機會親眼目睹美國又一次將「一個中國」由「偽中華人民共和國」這一邊推過去中華民國那一邊。不過這次在華代理人更替應該是同類把戲的最後一次，因為那個「偽中華人民共和國」將會永遠消失。

美國是從來不承認中國——無論是中華民國或是「偽中華人民共和國」——對台灣擁有任何主權，台灣只是中華民國的托管地，是中華民國流亡海外的根據地，僅此而已；而蔣介石的陳年電報也許為此而在今時今日網上曝光。我推測美國會利用中華民國取代在中國大陸的「偽中華人民共和國」之後，台灣會透過公投獨立。美國不會容忍中國大陸和台灣「統一」成一個國家。從前不會，現在不會，將來亦不會。美國將會用一中一台互相制衡的模式甚至是「多個中國」這種新局面延續兩個中國這種政治把戲帶來的好處。

至於香港，在這齣大戲裏面只是其中小小的一幕，或許會是驚心動魄的一幕。覆巢之下，豈有完卵？在「支爆」的巨大浪潮之中，如果美國將香港吞併，變成有如關島那種地位的殖民地，已經是香港人的萬幸了。

[1] 民視：《1949年電文揭真相 蔣介石:台灣只是托管地》，二零一七年一月四日。
[2] 見吳俊瑩：《蔣中正怎麼說台灣法律地位》。
[3] 《日本駐台機構正式改名北京再表不滿》，新城電台，二零一七年一月三日。
[4] 《2 Japanese destroyers arrive in Philippines》，UPDATE.PH，二零一七年一月四日。
[5] 《俄反潛驅逐艦訪菲律賓深化海軍合作》，rfi， 二零一七年一月三日。
[6] 《批中國獨斷獨行　美軍擬亞太部署F-35戰機》，立場新聞，二零一七年一月四日。 其中提到：「美軍太平洋司令部空軍指揮官Terrence O'Shaughnessy上周六向美國《空軍時報》表明，其首要任務是做好部署，準備應付下一次的危機衝擊。亞太區局勢在2016年出現巨變，情況在2017年會持續，因此美國需要確保更大的空軍優勢。他明言中國愈來愈獨斷獨行，而俄羅斯又出動遠程轟炸機到北韓挑釁，因此區內形勢已變得更為複雜。」
[7] 《傳內地要求國企強制結匯》，now新聞， 二零一七年一月四日。
[8] 《中央智囊：應容許人民幣「一次過貶值」》，東網， 二零一七年一月三日。

*圖片說明：已換了美元現鈔的李綺玲小姐，蹺起雙腳等睇「支爆」這齣好戲。

論陳雲祭天兼談宗教同政治嘅關係

有網友針對陳雲話：「不是天子，何以代蒼生祭天？」呢個問題問得好好﹗




陳雲唔係天子，原本唔應該祭天，祭天係天子嘅職責。但現實係，中國已經推翻咗帝制，實行一種由土匪把持嘅偽共和政體，返唔到轉頭，唔會有政府官員代表中國人祭天，亦唔會有特區政府官員代表香港人祭天。全地球就只有陳雲一個人話要祭天，唔祭天則已，如果要祭天，除咗佢自己實行之外，咁重可以指望邊個呢？

王字，據《說文解字》：「天下所歸往也。董仲舒曰：『古之造文者，三畫而連其中，謂之王。三者——天、地、人也，而參通之者，王也。』孔子曰：『一貫三爲王。』」而家陳雲所做嘅事，就係攝行天子之事，呢種事，周公都做過，特殊嘅情況自有特殊嘅做法，呢啲叫做「權」；做人做事，要有「經」有「權」，而唔係死板板有「經」冇「權」。陳雲攝行天子之事，就係要喺香港發揮原本「王」「通天地人」嘅政治功能，為香港立穩固嘅根基，開長久嘅太平。


宗教係接通存在同虛無嘅樞紐，係人世間一切現實生活嘅基礎。選擇邊種宗教做基礎好關鍵，宗教出咗問題，所有嘢就出問題，政治只係一端，睇吓共產黨以無神論立國搞到最後人變成鬼、社會變成地獄就知宗教之緊要，一步都唔錯得。香港城邦論嘅根本係華夏邦聯論，而華夏邦聯論嘅根本係華夏上帝本教。陳雲點講呢？佢話：

「至於我這幾年來的思索，決定要復興華夏天帝信仰的本教，也是要建立華夏的天人之教，因為佛教不能立國，不能立人倫禮樂。佛教建立小國是可以的，例如不丹、泰國、錫蘭，與世無爭的內斂小國，但佛教不能立大國，不能建立號令天下的大國或城邦。華夏一向以天帝信仰為本，兼容佛道。至於基督之教，與華夏上帝信仰相同，也可以立人倫，建大國，然而基督教的俗世教權在歐美手上、在歐美帝國主義者手上，不在華夏，故此華夏要另立國家神壇而已。這正如斯拉夫族群的國家（如俄羅斯），要另立東正教會，不能跟隨羅馬教會，否則只會得到《聖經》而失去國家。

華夏上帝本教，這是比起香港城邦論、華夏邦聯論更為重要的國本，我守得很緊。所謂天命所歸，不是說我是天子，而是說舉世之間，誰會做這種傻事？明朝來華的利瑪竇之後，大家見到的人只有陳雲一個。

你沒有上帝的感召，你絕對不會做這種危險的事、毫無報酬的事，惹來殺身之禍與神貧之苦。」[1]

喺呢幾年本土運動當中，資質優劣、根器大小唔同嘅人由城邦論所汲取嘅大有不同，例如器量狹小只係著眼香港境內嘅人就竊取香港城邦論改造成香港民族論；唔明白政治植根於宗教、此岸建基於彼岸嘅人就會耻笑祭天；唔理解陳雲識量嘅人就質疑陳雲有咩資格祭天。
 
一個人嘅識量有幾宏通，佢嘅成就就有幾巨大；一個國家嘅根源有幾深遠，佢嘅規模就有幾雄偉。我相信陳雲畀香港嘅係最輝煌嘅政治，因為佢親身祭天，將香港嘅根源直接皇天上帝﹗

[1] 見陳雲2017年1月2日facebook。
圖片說明：香港復興會候王廟祭天儀式
圖片來源：2015年2月15日《本土新聞》。 

到底可唔可以講「皇天擊殺」呢？

曾經有網友叫我唔好講，理由係「等同妄稱神的名」。呢個講法應該係根據《出埃及記》第二十章第七節：「不可妄稱耶和華你　神的名；因為妄稱耶和華名的，耶和華必不以他為無罪。」我唔係聖經專家，但據我有限知識理解，呢位朋友係誤解咗呢段經文。古今中外，要役使鬼神，首先你要知道佢嘅真名，名字就係事物嘅本質，知道個名，就可以把握本質；講出嗰個神嘅名，就可以用到嗰個神嘅力量。呢個係宗教常識（驅鬼嘅原理都一樣，都係要諗辨法知道佢個名，一知道佢個名就容易辦）。喺古以色列，曾經稱神之名而行咒術係好普遍，後嚟就禁止咗。上帝之名只在祭司之間口耳相傳，據講每講一次神之名其力量都足以令宇宙為之震動。上帝之名有四個音節，就係所謂tetragrammaton[1]。稱上帝之名而咒人，同講「皇天擊殺」性質係一樣嘅，但係兩者唔能夠等量齊觀。前者係涉及實際嘅巫術操作，後者只係一句表達憤慨之語。華夏自古亦有咁嘅鬧人方法，例如孔子就講過「天厭之！天厭之！」，直譯成英文就係「God damn it! God damn it!」，你唔能夠因孔子講過呢句說話就認為孔子唔敬上天。如果講「皇天擊殺」就等如唔敬上天，咁連帶講「等天收啦」都應該禁止喇，因為「等天收啦」只係「皇天擊殺」一個比較克制嘅講法。


信仰一種外來宗教，如果你一唔識撰寫該宗教經典所用嘅外語[2]、二唔了解該宗教產生過程中嘅一般社會情況，而只靠翻譯本經典再外加傳教士或「師父」指導，甚至自己望文生義去釋經，咁樣會好蝕底。因為宗教信條係要信眾生死以之嘅。由釋經而產生誤解，因誤解而盲目亂嚟，甚至挑起不必要嘅衝突，唔單止唔能夠喺將來得救，恐怕今生亦會遭到沒頂之災。

讀書先要識字，呢個係清代人讀古書嘅結論。其實讀天下書都一樣，包括你認為神聖不可侵犯嘅宗教經典。

[1] 可參看Wikipedia「tetragrammaton」一條。
[2] 例如基督徒唔識希伯來文、希臘文，佛教徒唔識梵文、巴利文、藏文。

鍾樹根的九蒸九曬「洗底工程」

太陽之下無新事，而共產黨演的戲比電視劇更沉悶。

鍾樹根忽然變成「本土」中人，只是中共針對香港政治最新形勢向「本土」傾斜的一種部署，而其手法又「太戲，不像」（李贄評《琵琶記》語，意謂太似做戲，反而失真）。

容我為各位看官點明，這台戲只有四幕：

第一幕：先由鍾樹根在港島地區掛上數個印有「要本土不要分離」的大型廣告牌[1]，一出場就比較突兀，可是無辦法，土共講「本土」，横空出世，只能如此；而且由於廣告牌很大，最終被人揭發廣告牌涉及僭建，令這個「本土派轉向」更觸目。[2]

第二幕：五月中張德江訪港期間，不忘順便批評一下「本土」。[3]共產黨官員說甚麼、不說甚麼，當然不會是即興表演，而是全部都在計劃之中，只是還未曾手執劇本邊看邊讀而已。批評「本土」，中聯辦都可以了，何須勞動京官？ 張德江說：「現時有極少數人打著港獨旗號，認為不是本土問題，而是以本土之名，行分裂之實，違背『一國兩制』的初心。」張德江所講的「以本土之名，行分裂之實」，不就正正是對著鍾樹根所講的「要本土不要分離」嗎？真箇是接吻都沒有那麼吻合。

第三幕：終於到了民建聯大花旦李慧琼出場了，民建聯中委會6月1日晚開會決定港島區立法會選舉將原先擬派出的兩張名單合二為一，屬意由民建聯副主席、中西區區議員張國鈞領軍，放棄鍾樹根。鍾樹根感到「好無奈、失望、唔開心」[4]，更自拍一條短片放在自己的面書上如泣如訴，有「極表遺憾與無奈」，「本人甚不理解、亦不敢苟同」等語。[5]更明言考慮退黨以獨立人士身份參選。[4]

第四幕：「棄根」後，當然難免一場口角了。李慧琼堅持「棄根」對民建聯發展最有利，坦言「政治係殘忍」。鍾樹根除了說民建聯的決定「非常奇怪、難以理解」；更稱不排除有更高層次人士，暗示中聯辦在背後操縱事件。又反駁李慧琼的「政治係殘忍論」，謂：「政治對任何人都好殘忍，睇吓幾時落到嗰個人身上嘅啫，希望我係最後一個。」[6]非但口角而已，為了達到火上加油的效果，鍾樹根更揭發民建聯配票，令觀眾相信鍾和民建聯乃至中聯辦確實決裂。[7]

這齣四幕劇到此為止，鍾樹根成功塑造既同民建聯鬧翻又得罪中聯辦的本土獨立人士形象，為中共完成了由土共擘開一少部份人士扮演「本土派」參選的政治任務。傳統政治團體為了應對香港政治最新形勢而另起一個「本土」分枝並非新鮮事，例如泛民主派擘開范國威、毛孟靜落注本土一樣，但對形象「緊跟中央」的土共來講難免先要大費周章先做一齣戲；而以現今中共的編劇水平，這齣戲又不見得能騙到全部看電視劇長大的香港人。「以文藝治國」是中國政治傳統[8]，可是以中共編排的這齣《鍾樹根大鬧民建聯》觀之，中共大概亦氣數已盡，人材凋零。曲終人散，看來時候不遠了。

[1] 見《 掛廣告牌忽然「本土」 鍾樹根：要告訴市民本土不等於分離》，2016年5月6日《蘋果日報》。

[2] 見《 民建聯招牌涉 鬧市僭建》，2016年4月15日《am730》。

[3] 見《張德江批評香港極少數人以本土之名行分裂之實》，RTHK報導。

[4] 見《棄鍾樹根　民建聯一張名單戰港島》，6月2日《蘋果日報》。

[5] 見《誰是根毛毛？ Tree根靠晒佢彈起 》，6月2日《蘋果日報》即時新聞。

[6] 見《鍾樹根暗示：中聯辦插手棄根 反駁李慧琼政治殘忍論 「睇吓幾時落到佢身上」》，6月3日《蘋果日報》。

[7] 「鍾樹根繼日前暗示中聯辦插手建制選舉部署後，昨又大爆民建聯於上屆立法會選舉投票日，利用票站調查即時數據配票，調動義工為工聯會港島候選人王國興拉票，令王最終勝出。有泛民指屬嚴重事件，除違反選舉事務處的票站調查指引，更破壞選舉公正性，要求選管會徹查事件。」見《票站調查配票　 鍾樹根爆民建聯違規》，6月4日《蘋果日報》。

[8] 馮象語。

圖片來源：區家麟：《只剩下樹根》